無題

呢排好灰，遇到身邊好多人好多事都令我覺得呢個世界係咪變左 ? 定係我變左 ? 定係完全冇變過, 一直都係咁 ? 呢個問題留返最後至答。
呢段文章冇主題,所以叫做無題，行文交錯亦唔會有任何次序，無章無法，有咩都講，全無保留，睇得明就明，睇唔明可以當冇睇過。時間過得快，身邊經歷既事亦多，不過光怪陸離唔多開心既事比較多，值得歡喜既事愈來愈少，之前少，現在更少。...

一日,有人走入黎問我，應該係話質問，"喂你報銷果 $27 蚊係點架? 呢度幾多蚊呢度幾多蚊加埋都係$24蚊,咁果$3蚊呢?" , 我用一貫客氣既口吻曰 " 哦，果$3蚊係搭地鐵既" , "咁你要寫埋落去嘛,唔係人地第日黎 audit 就唔知咩事!咁食飯呢? 食飯果$30蚊係咪冇單? " ...我已經唔想答佢(實情我埋單過百，我都唔想報咁大。) 我小你，你老世話我地自己點慳都冇用,其他人使錢使到傻，我心諗，呢d 野你唔係唔知呀 ? 人地倒水咁你就有心無力,我呢 d 幾蚊雞你就追住唔放，你冇事呀 ?

Facebook, 曾經係一個留連忘返既地方，宜家都係，不過遊戲就玩少左，對 facebook呢類互動性強既平台亦有左介心!你會發覺，你講野必須小心，日常生活同其他人對話要小心慎言我理解亦都逐漸調節，但 facebook係屬於個人既地方，雖則不能發及放任何違法既言論，但基本上你會比正常情況下有更多既保留，因為，隋時隨地上面有幾十對眼同時知道你寫緊 d 乜，一不留神你寫錯兩個字或者表達得令人誤會，某 d 衛道之士可能就會走出黎插你，何苦呢 ? 我講野既對象又唔係你地，你有你既世界，我有我既天地，各不相干呼好囉，你大佬冇教你地應該多 d 體諒我地 d 爛仔既咩? 今時今日，連講野既自由都要被無形封鎖，攪到咁你話死唔死..
自我認同，自我認同其實好重要，呢個係關乎你對自己有冇信心，你肯唔肯定自己既價值，無論係社會上既存在價值，抑或係工作上，朋友圈子上等等...偏偏，我對自己既認同係愈來愈低，或者低處未算低，一個問題時時刻刻刺痛我內心，究竟我喺度做乜? 我可以做d咩?我應該黠做?未來呢半年我係咪可以做返一兩件有成績既事等年尾好交差? 邊個可以比到少少指引我? 我逗呢份人工真係逗得好冇味，情聖講得0岩，工作最緊要做得開心，咩人工咩post咩title係其次，舊同事聽我咁講表示100%理解，因為我相信好多人都有如是經歷，但係呢個世界不停地轉，你今日唔向前你好快就會被人拋在後面，我係做IT既，我深明呢個定理，即如我成日同我媽講,你要接受同知道呢個世界發生緊咩事，你喜唔喜歡一回事，但最少你要明白時代會不停演變，你有冇見過搭地鐵有d公公婆婆係唔識得入銀仔買ticket?我就見過好多次，你唔學，你唔肯去了解，你好快會同時代脫節，咁樣會好大鑊，我成日講，我唔聽 lady gaga，唔=我唔知道有呢個人存在...就係咁簡單!

講開認同，可以講多少少同呢個話題有關既野，日常工作我接觸到好多所謂勁人，有 d 係N咁多張certificate，有d耐不耐接受新聞訪問等，我本人從來唔懷疑佢地在某個範疇裡面既能力極之桌越，不過人最基本既禮義廉恥係頗為欠奉，我用頗為而唔用完全已經較為客氣，而最崎型既係呢d人又會得到力捧，受到高層高度讚賞，我雖然唔係衛道之士，但有時我比你地更加衛道，人讀書唔多唔係錯，唔叻唔係罪，但係人與人之間最基本既尊重應該點都要有掛?我任你某方面點叻點勁都好，你做人個品格差就點都得唔到大多數人既愛戴，但係今時今日急功近利既社會現象已經令人漸漸遺忘呢樣人性最原始既野，不論上下都係咁，哪怕你神憎鬼厭，總之業績重於一切，務實小於塵，吹水大過天...
待續....